ராகுல் காந்தியைப் பற்றிய ஒபாமாவின் கருத்துக்கு எதிர்ப்பு தெரிவித்த காங்கிரஸ் கட்சி!!

யார் ஒருவராலும் வெறும் 10 நிமிடத்தில் ஒருவரைப் பற்றி அறிந்து கொள்ள முடியாது.  ராகுல் காந்தியைப் பற்றி ஒபாமா மதிப்பிட்டது தவறு” என்று காங்கிரஸ் கட்சி தெரிவித்துள்ளது.

பதற்றமானவர், பக்குவப்படாத தலைவர் என்று காங்கிரஸ் முன்னாள் தலைவர் ராகுல்காந்தி குறித்து அமெரிக்க முன்னாள் அதிபர் பராக் ஒபாமா தனது நினைவுக் குறிப்புப் புத்தகத்தில் குறிப்பிட்டுள்ளதாக ஆங்கில ஊடகத்தில் வெளியாகியுள்ளது.

இதைப்பற்றி கருத்து தெரிவித்த காங்கிரஸ் கட்சியின் தலைமைச் செய்தித் தொடர்பாளர் ரந்தீப் சுர்ஜேவாலா, “ஒரு தனிப்பட்ட நபரின் கருத்துகளைக் கொண்ட புத்தகம் பற்றி, அதற்கு பின்னால் இருந்து இயக்கப்படும் ஊடகத்தில் வெளியான செய்திகள் குறித்து கருத்துக் கூற விரும்பவில்லை” என்று தெரிவித்துள்ளார்.

சில காங்கிரஸ் தலைவர்கள் பராக் ஒபாமாவின் கருத்தை எதிர்த்திருக்கிறார்கள். “ஒபாமா அவர்களே, யார் ஒருவராலும் வெறும் 5 முதல் 10 நிமிடத்தில் ஒருவரைப் பற்றி அறிந்து கொள்ள முடியாது. சில சமயங்களில் பல ஆண்டுகள் கூட ஆகலாம். ராகுல் காந்தியைப் பற்றி நீங்கள் மதிப்பிட்டது தவறு” என்று கட்சியின் செய்தித் தொடர்பாளர் உதித் ராஜ் கூறியுள்ளார்.