பலியிடப்படும் ஏழைகளின் கனவுகள்: எகிப்தை உலுக்கும் பணவீக்கமும், சாமானியனை வதைக்கும் ஈத் திருநாள் செலவுகளும்!

தியாகத் திருநாளான ஈத் அல்-அதா நெருங்கிவிட்ட நிலையிலும், எகிப்தின் கால்நடைச் சந்தைகள் வழக்கத்திற்கு மாறான அமைதியில் மூழ்கிக் கிடக்கின்றன. தலைமுறை தலைமுறையாக எகிப்து முஸ்லிம்களின் வாழ்வில் இரண்டறக் கலந்த ஒரு மத வழிபாட்டுச் சடங்கு, இன்று தாங்க முடியாத ஒரு பெரும் பொருளாதாரச் சுமையாக மாறியிருக்கிறது. விண்ணைத் முட்டும் கால்நடை விலைகள், கட்டுக்கடங்காத பணவீக்கம், அமெரிக்க டாலருக்கு நிகரான எகிப்திய நாணயத்தின் வீழ்ச்சி மற்றும் பிராந்தியப் போர்ப் பதற்றங்கள் ஆகியவை எகிப்திய குடும்பங்களை தங்களின் வாங்கும் சக்தியைக் குறைத்துக் கொள்ள கட்டாயப்படுத்தியுள்ளன. வேறு வழியின்றி, பல நடுத்தரக் குடும்பங்கள் தங்களுக்குள் பணத்தைச் சேர்த்து கூட்டாகப் பலியிடத் தொடங்கியுள்ளனர்; ஏழைகளோ மாற்று வழிகளைத் தேடி அலைகிறார்கள்.

ஆனால், இந்த நெருக்கடி வெறும் பண்டிகை காலத்தோடு முடிந்துவிடுவதல்ல. எகிப்திய பொருளாதாரத்தின் அடிநாதத்தையே உலுக்கிக் கொண்டிருக்கும் ஒரு மாபெரும் கட்டமைப்புத் தோல்வியின் வெளிப்பாடு இது. எகிப்து அரசு இறக்குமதியை மட்டுமே அளவுக்கு அதிகமாக நம்பியிருப்பது, தீவன உற்பத்தியில் தன்னிறைவு இல்லாதது மற்றும் செங்கடலில் தொடரும் போர்ப் பதற்றங்கள் ஆகியவைதான் இந்த விலைவாசி உயர்வுக்குப் பின்னால் இருக்கும் கசப்பான உண்மைகள். 2025-ஆம் ஆண்டின் முதல் பத்து மாதங்களில் மட்டும் எகிப்து சுமார் 1.1 பில்லியன் டாலர் மதிப்பிலான விலங்கின உணவுப் பொருட்களை வெளிநாடுகளில் இருந்து இறக்குமதி செய்துள்ளது. நாட்டின் மொத்த இறக்குமதியான 84.4 பில்லியன் டாலரில் இது 1.3 சதவீதமாகும். எகிப்திய மக்களின் இறைச்சித் தட்டுப்பாடு முழுமையாக டாலரின் ஆட்டத்திலும், வெளிநாட்டு விநியோகஸ்தர்களின் கைகளிலும் சிக்கிக் கிடக்கிறது என்பதற்கு இந்தத் தரவுகளே சாட்சி.

 முடங்கிய தீவனத் தொழிலும், தவணை முறை ‘குர்பானியும்’!

ஏன் எகிப்தில் கால்நடை வளர்ப்பு இத்தனை விலை உயர்ந்ததாக மாறியது? பொருளாதார வல்லுநர்கள் இதற்கான காரணத்தை மிகத் துல்லியமாக விளக்குகிறார்கள். எகிப்தில் கால்நடைகளை வளர்ப்பதற்கான இயற்கை மேய்ச்சல் நிலங்கள் (Natural Pastures) கிடையாது. இதனால், கால்நடைத் தீவனத் தொழில் முற்றிலும் வெளிநாடுகளில் இருந்து இறக்குமதி செய்யப்படும் மக்காச்சோளம் மற்றும் சோயா பீன்ஸையே நம்பியுள்ளது. எகிப்து ஆண்டுதோறும் 14 முதல் 17 மில்லியன் டன் தீவனங்களை இறக்குமதி செய்கிறது. டாலரின் மதிப்பு உயரும்போது தீவனத்தின் விலையும் எகிறுகிறது, அது நேரடியாக ஆடு, மாடுகளின் விலையில் எதிரொலிக்கிறது.

இங்குதான் ஒரு விசித்திரமான முரண்பாடு பிறக்கிறது: எகிப்தின் உள்ளூர் ஆடுகளை விட, தொண்டு நிறுவனங்கள் வெளிநாடுகளில் இருந்து இறக்குமதி செய்து தரும் இறைச்சியின் விலை குறைவாக உள்ளது! எகிப்திய தீவனத் தொழில் எவ்வளவு பெரிய முடக்கத்தைச் சந்தித்துள்ளது என்பதற்கு இதுவே ஆகச்சிறந்த உதாரணம். சாமானிய மக்களின் வாங்கும் சக்தி குறைந்ததால், இந்த ஆண்டு குர்பானி கொடுப்பதற்கான தொண்டு நிறுவனங்களின் ரசீதுகள் (Vouchers) விற்பனையாவது பெருமளவில் சரிந்துள்ளது.

நிலைமை மோசமானதால், எகிப்து அரசு இப்போது “தவணை முறை குர்பானி” (Sacrifices by Instalment) திட்டத்தை அறிமுகப்படுத்தியுள்ளது. எகிப்திய மத நல்லிணக்க அமைச்சகத்தின்படி, இறக்குமதி இறைச்சியின் ரசீது 7,000 எகிப்திய பவுண்டுகளாகவும் (சுமார் $133), உள்ளூர் இறைச்சியின் ரசீது 9,500 பவுண்டுகளாகவும் ($181) நிர்ணயிக்கப்பட்டுள்ளது. மக்கள் ‘டிஜிட்டல் எகிப்து’ செயலி வழியாக ஆறு மாத காலத் தவணையில் இதற்குப் பணம் செலுத்தலாம். ஒரு மத வழிபாட்டைச் செய்வதற்கு மக்கள் வங்கிக் கடன் வாங்க வேண்டிய அவல நிலைக்கு எகிப்திய பொருளாதாரம் தள்ளப்பட்டுள்ளது.

 செங்கடல் பதற்றமும், எகிப்தின் வியூகத் தவறுகளும்

இந்த உள்நாட்டுப் பொருளாதாரச் சீரழிவை, செங்கடல் பகுதியில் நிலவும் புவிசார் அரசியல் போர்கள் மேலும் மோசமாக்கியுள்ளன. அமெரிக்க-இஸ்ரேல் படைகளுக்கும் ஈரானுக்கும் இடையே வெடித்துள்ள மோதலால், செங்கடலின் பாப் எல்-மந்தேப் (Bab el-Mandeb) நீரிணையில் கப்பல் போக்குவரத்து முற்றிலுமாக முடங்கியுள்ளது. இதனால், சரக்குக் கப்பல்கள் ஆப்பிரிக்காவைச் சுற்றி நீண்ட கடல்வழியாக (Cape of Good Hope) வர வேண்டியுள்ளதால், கப்பல் வாடகையும் காப்பீட்டுக் கட்டணமும் தாறுமாறாக உயர்ந்துள்ளன. இந்த மறைமுகச் சுமை இறுதியில் நுகர்வோரின் தலையில்தான் விடிந்துள்ளது.

அமெரிக்க-இஸ்ரேல் படைகள் ஈரான் மீது போரைத் தொடங்குவதற்கு முன்பு, எகிப்தில் ஒரு கிலோ உயிருள்ள கால்நடையின் விலை 170 எகிப்திய பவுண்டுகளாக ($3.2) இருந்தது; அது தற்போது 230 பவுண்டுகளாக ($4.4) உயர்ந்துள்ளது!

பொருளாதார வல்லுநர் சமிரா அல்-கஸ்ஸாரின் கூற்றுப்படி, எகிப்து அரசின் மிகத் தவறான வியூக முன்னறிவிப்பே இதற்கு முக்கிய காரணம். எகிப்து தனக்குத் தேவையான மலிவான ஆடு, மாடுகளை அண்டை நாடான சூடானில் (Sudan) இருந்துதான் நிலவழியாக இறக்குமதி செய்து வந்தது. ஆனால், அங்கு நிலவும் உள்நாட்டுக் கலவரங்களையும், பிராந்திய மாற்றங்களையும் கணக்கில் கொண்டு மாற்று வியூகங்களை உருவாக்க எகிப்து அரசு தவறிவிட்டது.

அரசாங்கம் பில்லியன் கணக்கான டாலர்களை நீண்டகால உள்கட்டமைப்புத் திட்டங்களில் (Infrastructure projects) முதலீடு செய்கிறதே தவிர, நாட்டின் உணவுப் பாதுகாப்பை உறுதி செய்யும் விவசாயம் மற்றும் கால்நடைத் துறைக்கு முறையான மானியங்களையோ, சிறு விவசாயிகளுக்கான கடனுதவிகளையோ வழங்குவதில்லை. கடந்த மே 17 அன்று அதிபர் அப்தெல் ஃபத்தா அல்-சிசி, 15 பில்லியன் டாலர் மதிப்பில் ‘புதிய டெல்டா திட்டம்’ (New Delta Project) மூலம் 2.2 மில்லியன் ஃபெடான் பாலைவன நிலங்களை விவசாய நிலங்களாக மாற்றும் திட்டத்தைத் தொடங்கினாலும், அதன் பலன் சாமானியர்களைச் சென்றடைய இன்னும் பல ஆண்டுகள் ஆகும்.

 அடுத்து என்ன? எகிப்தின் உணவு இறையாண்மை எங்கே?

தற்போதைய சூழலில், எகிப்திய சந்தையில் “தேக்கவீக்கம்” (Stagflation) நிலவுகிறது; அதாவது பொருட்களின் விலை உச்சத்தில் இருக்கிறது, ஆனால் வாங்குவதற்கு மக்களிடம் காசில்லை. மாமிச நுகர்வு என்பது பணக்கார நகர்ப்புற மக்களுக்கும், ஏழை கிராமப்புற மக்களுக்குமான வர்க்கப் பிளவை எகிப்தில் வெளிச்சம் போட்டுக்காட்டுகிறது. ஈத் திருநாளுக்கு இன்னும் சில நாட்களே உள்ள நிலையில், விலை குறையும் என்ற நம்பிக்கையில் மக்கள் காத்திருக்கிறார்கள்.

எகிப்தின் இந்த ஆட்டுக்குட்டி விலை நெருக்கடி உலகிற்கு உணர்த்தும் பாடம் ஒன்றுதான்: ஒரு நாட்டின் உணவுப் பாதுகாப்பு என்பது வெறும் சந்தை கண்காணிப்போடு முடிந்துவிடுவதல்ல. அது தேசியப் பாதுகாப்பின் ஒரு முக்கிய அங்கம். எகிப்து “இறக்குமதி மூலம் தேவையைப் பூர்த்தி செய்யும்” இடைக்கால பாணியை முற்றிலுமாக கைவிட்டு, தங்களின் சொந்த மண்ணில் உற்பத்தியை பெருக்கும் “உணவு இறையாண்மையை” (Food Sovereignty) நோக்கி நகர்ந்தால் மட்டுமே, வருங்காலத்திலாவது எகிப்திய ஏழைகளின் தியாகத் திருநாள் கனவுகள் பலிக்கக்கூடும்.