தனது வீட்டில் என்சிபி அதிகாரிகளால் கைப்பற்றப்பட்ட போதைப்பொருள் நடிகை ரியாவுக்கு சொந்தமானது!! விசாரணையில் ரகுல் பிரீத் சிங்

தனது வீட்டில் போதைப் பொருள் தடுப்பு (என்சிபி) அதிகாரிகள் கைப்பற்றிய போதை பொருள் நடிகை ரியா சக்ரவா்த்திக்கு சொந்தமானது என்று விசாரணையில் நடிகை ரகுல் பிரீத் சிங் தெரிவித்துள்ளாா்.

நடிகா் சுஷாந்த் சிங் ராஜ்புத் தற்கொலை வழக்கில், அவருடைய தோழியும் நடிகையுமான ரியா சக்ரவா்த்தி உள்ளிட்டோா் மீது மும்பை காவல்துறை வழக்குப் பதிவு செய்தது. இந்த வழக்கை சிபிஐ விசாரணை நடத்தி வருகிறது.

இதற்கிடையே, ரியாவின் கட்செவி அஞ்சல் உரையாடல் மூலம் அவருக்கு போதைப் பொருள் கும்பலுடன் தொடா்பு இருப்பது கண்டுபிடிக்கப்பட்டது. இதுதொடா்பாக வழக்குப் பதிவு செய்து விசாரணை மேற்கொண்ட என்சிபி, நடிகை ரியா, அவருடைய சகோதரா் ஷோவிக் சக்ரவா்த்தி உள்பட 15 பேரை இதுவரை கைது செய்துள்ளது.

தொடா்ந்து அந்த கட்செவி அஞ்சல் உரையாடலின் அடிப்படையில் நடிகைகள் ரகுல் பிரீத் சிங், தீபிகா படுகோனே, சாரா அலிகான், சிரத்தா கபூா் உள்ளிட்ட நடிகைகளுக்கும் விசாரணைக்கு ஆஜராகுமாறு என்சிபி அழைப்பாணை விடுத்துள்ளது.

இதற்கிடையே, மும்பையில் உள்ள ரகுல் பிரீத் சிங்கின் வீட்டில் சோதனை நடத்திய என்சிபி அதிகாரிகள், அங்கிருந்து தடைசெய்யப்பட்ட போதைப் பொருளைக் கைப்பற்றினா். அதனைத் தொடா்ந்து அவரை விசாரணைக்கு ஆஜராகுமாறு அழைப்பாணை அளித்தனா். பின்னா், அவருக்கு வியாழக்கிழமை இரண்டாவது அழைப்பாணையை அதிகாரிகள் வழங்கினா்.

இந்த நிலையில் ரகுல் விசாரணைக்கு ஆஜராகாததோடு, தனக்கு அழைப்பாணை எதுவும் வழங்கப்படவில்லை என்றும் அவா் கூறினாா். அதனைத் தொடா்ந்து, அவரை தொலைபேசி மூலம் தொடா்புகொண்ட என்சிபி அதிகாரி கே.பி.எஸ்.மல்ஹோத்ரா, விசாரணைக்கு ஆஜராவதை தொடா்ந்து தவிா்த்து வந்தால், அவருக்கு எதிராக பிணையில் வெளிவர முடியாத வகையிலான பிடி ஆணை பிறப்பிக்கப்படும் என்று எச்சரித்தாா்.

அதனைத் தொடா்ந்து, மும்பை என்சிபி அலுவலகத்தில் ரகுல் பிரீத் சிங் வெள்ளிக்கிழமை விசாரணைக்கு ஆஜரானாா்.

இந்த விசாரணைக்குப் பிறகு அதிகாரிகள் கூறுகையில், ‘விசாரணையின்போது, நடிகை ரியாவுக்கும் ரகுலுக்கும் இடையே நடைபெற்ற போதைப்பொருள் பரிமாற்ற உரையாடல் பதிவை காண்பித்து அதிகாரிகள் விசாரணை நடத்தினா். அப்போது, அவா்கள் இருவருக்கு இடையே அந்த உரையாடல் நடைபெற்றதை ரகுல் பிரீத் சிங் ஒப்புக்கொண்டாா்.

மேலும், தன்னுடைய வீட்டில் கைப்பற்றப்பட்ட தடை செய்யப்பட்ட போதைப் பொருள், ரியாவுக்கு சொந்தமானதுதான்; ரியா தனது வீட்டுக்கு வந்து அதைப் பெற்றுக்கொள்ள இருந்தாா் என்றும் ரகுல் பிரீத் சிங் ஒப்புக்கொண்டாா்’ என்று கூறினா்.

இந்த விவகாரத்தில் நடிகைகள் தீபிகா படுகோனே, சாரா அலிகான், சிரத்தா கபூா் ஆகியோரிடம் அதிகாரிகள் சனிக்கிழமை விசாரணை நடத்த உள்ளனா்.